إسكريبت كامل و حصري بقلم الكاتبه أيه حمام

الفصل الاول
_مش ندمانة إنك قتلتيه
_من ناحية ندمانة ف أنا ندمانة والله يا أبلة بس ندمانة إني مخلصتش عليه من زمان.
بصيت لها باستغراب من كلامها ف سألتها من تاني
_يعني إيه
_يعني دا واحد مكانش يستاهل إنه يعيش واحد حيوان كل همة إنه يرجع آخر اليوم يطفح لقمته ويتخمد وخلاص مش فارق معاه مراته ولا كإنها موجودة ولا كإنها في حساباته.
_بس دا مش مبرر للقتل وإن الإنسان يرتكب ذنب عظيم زي دا كان ممكن أبسط حاجة تطلبي منه الطلاق وكل واحد يروح ل حاله.
ضحكت بس حسيتها بتضحك باستهزاء بكلامي ف سألتها
_بتضحكي على إيه
_أصلك بتأكديلي مثل ال إيده في الماية مش زي ال إيده في الڼار.
_يعني إيه
_يعني طول ما أنت متحطتيش في نفس موقفي وعيشتي ال أنا عيشته ف أنت هتتكلمي وتنصحي وتقولي كل ال نفسك فيه ما هو الكلام ببلاش.
_مش لازم علشان ممريتش بتجربتك أبقا مش حاسة بيك أو أبقا غير مؤهلة للنصيحة!
_كلامك حلو والله يا أستاذة بس جاي متأخر بقا أو مبقاش له لزوم دلوقتي ال حصل حصل وزي ما قولت لك.. لو رجع بيا الزمن تاني كنت هعمل نفس التصرف.
بصيت لها بعدم تصديق على إصرارها وكمية الحقد والكراهية ال في عيونها.. أو يمكن ۏجع وقهر!
رجعت المجلة بعد ما خلصت ودخلت المكتب وبدأت أفرغ كل ال سمعته منها وأنا مركزة جدا لحد ما لقيت حد بيحط قدامي كوباية قهوة ف رفعت راسي ولقيتها جنة ف خلعت النضارة واتكلمت
_بجد تسلمي أنا كنت محتاجاها فعلا دماغي خلاص هتشت من كتر ال فيها.
_ما أنا لقيتك جيتي في وشك وبدأت تكتبي علطول ف قولت أجيب لك حاجة وآجي أقعد معاك وتاخدي بريك شوية.
_يديمك يا حبيبتي.
_ها جايبة النهاردة خبر إيه بقا
_خبر قتل زوجة ل زوجها علشان زهقت منه!
بصت لي باستغراب بعدين ضحكت ف اتكلمت
_بتضحكي على إيه على العنوان ولا على الخبر نفسه.
_الاتنين الحوار دا بقا عادي جدا يا آية دلوقتي يعني لو عدى يوم من غير چريمة زي دي ف يحصل خلل في توازن الكون!
_بس إحنا كدا بنضيع يا جنة الست بسألها لو كانت ندمانة وبكل قوة بتقول لي لاء ولو رجع بيها الزمن هتعمل كدا تاني.
ماشي أيا كانت حجم معاناتها وأيا كان التاني ال كانت معاشراه دا كويس أو زفت بس دا مش مبرر.
فيه أكيد أسباب ورا انتشار نوعية الچرائم دي غير طبعا الأسباب المادية أو الأسباب ال بتتقال لنا.
_معاك في كل دا
وعايزة أقول لك إن أنا عرفت بقا إن فيه قرى متسجل فيها الشهر ال فات حالات وفيات بمعدل أكتر من اتنين أو تلاتة يوميا ومعظمهم حالات ۏفاة ل شباب.
الرقم ممكن يظهر ل ناس رقم عادي بس لو حسبناها وفكرنا شوية.. لو فضل المعدل دا كدا أو زاد ف ممكن البلاد دي أهلها يخلصوا في خلال سنة مثلا.
_لا حول ولا قوة إلا بالله العلي العظيم صدقيني إحنا في غفلة وکاړثة.
_بإيدنا إيه بس أكتر من المقالات ال بنكتبها وبنحاول نظهر للناس إن دا غلط
_لاء بإيدنا كتير بصي
أنا عندي فكرة.
_إيه هي
_إحنا نقول ل أستاذ جلال يبعت صحفيين من المجلة هنا للأماكن ويشوفوا أهلهم والأحوال وأكتر الحالات المسيطرة عليهم.
_تفتكري هيوافق
_هنجرب بس دلوقتي همشي بقا علشان المفروض هقابل غيث وإتأخرت عليه.. بس فكري هنقنع أستاذ جلال إزاي.
قولت كدا وأنا بلم الورق ال كان متنعكش على المكتب وحطيته في الدرج وقفلته وحطيت الموبايل وحاجتي في الشنطة ونزلت بسرعة.
_أنا آسفة والله إني إتأخرت حقك عليا.
كنت لسة واصلة الكافيه وإتأخرت بسبب الزحمة وإني نازلة من المجلة متأخرة.
ابتسم وهو بيقوم وبيشد لي الكرسي ف قعدت وإتكلم هو بعد ما رجع ل مكانه
_ولا يهمك أنا برضه لسة واصل من دقايق.
_طب الحمدلله طمني عليك.. عملت إيه في قضية النهاردة
_إتطلقوا طبعا.
إتنهدت بيأس بعد ما سمعت جوابه ورجعت أسأله
_كان عندهم أولاد صح
_أربعة.
_محاولتش تصلح بينهم خالص يا غيث
_كل واحد شايف إنه الطرف الأكثر تضحية في حياة الآخر وإنه مش بقا قادر يتحمل أكتر من كدا.
_وفي الآخر محدش هيعاني غير أولادهم ال هيبقوا متشحططين بين الطرفين وحياتهم هتبوظ.
_ربنا يعينهم.
سكت وأنا مش لاقية كلام أقوله له أو أعلق بيه بيوت كتير بعد ما الطرفين بيتخلوا عن بعض مش بيكون في حسابهم غير نفسهم مش مهم الأولاد مش مهم نفسيتهم مش مهم معاناتهم مش مهم...
أنا مش ضد فكرة الطلاق بالعكس.. لكن ضد فكرة إختيار شريك غير مناسب من البداية وضد فكرة إنجاب أطفال كتير في حال إن البيت مش كويس ومش مؤهل.
فوقت من شرودي على إيده ال مسكت إيدي وكلامه
_هتفضلي في كل مرة آجي أقول لك خبر انفصال اتنين عندهم أولاد تزعلي وتضايقي نفسك كدا
_غصب عني يا غيث مش بقدر أستحمل فكرة إن فيه ناس تانيين هيدفعوا تمن فعل زي دا.
بس بقول يمكن علشان أنا حسيت نفس المعاناة دي وإتوجعت منها كتير ف مش عايزة غيري يمر بيها.
_الإنسان لما بيتوجع فعلا بيكون مش عايز غيره يتوجع ويحس زي ما هو حس مش بيقولوا إن فاقد الشيء يعطيه
بس دا مش مقياس يا حبيبتي تخيلي كدا لو مبقاش حد يعاني أو يتألم
هيطلع جيل معندوش القدرة على التحمل أو المواجهة والاستمرارية الرفاهية هتزيد والدلع هيزيد أكتر وقتها هيبقى الضرر أكبر وأقوى.
لازم كلنا نعاني ولازم كلنا الدنيا تيجي علينا علشان نبقى رجال.
_تفتكر فعلا
_مفتكرش أنا متأكد.
وعلفكرة أنا بكلامي دا مش ببرر كل ال بيحصل أنا بس بوضح لك فكرة إن لازم يبقى فيه جزء معاناة ودراما في حياتنا علشان نتبني صح.
وبعدين يا حبيبتي فيه حد عانى أو اتبهدل أكتر من الرسل والأنبياء والصحابة رضوان الله عليهم جميعا!
_بس دول غير!
_غيرنا في المنزلة والإيمان أكيد.. لكن في النهاية هم بشړ زينا!
_بس كانوا ضامنين الجنة يا غيث ف بالتالي يهون أي ۏجع في الدنيا قصاد الجنة.
_ضمنوا الجنة نتيجة صبرهم وتحملهم.
وإحنا كمان مكتوب لنا الجنة لو صبرنا واحتسبنا أجرنا عند الله في أي حاجة تصيبنا..
_الله يرزقنا الثبات والقوة والصبر والجنة.
_اللهم آمين يا حبيبتي.
قولي لي أنت بقا.. أخبارك إيه النهاردة جبتي خبر جديد.
_أيوا حاجة شبيهة لك برضه.. واحدة قټلت زوجها!
_استر يارب.
_متخافش يا حبيبي أنا أجبن من إني أعمل كدا.
ضحكنا وبعدين نده الويتر وطلبنا عصير وبدأت أحكي له على الخبر وعلى كلامي وفكرتي ال قولتها ل جنة.
_جنة خاېفة مستر جلال ميوافقش.
_بالعكس دا شيء كويس جدا.
لو عايزين أكلمه لكم أقول له باليل.
_لاء بلاش إحنا هنكلمه ونقنعه الأول وإن شاء الله يوافق.
مش حابة تتوسط لي عنده علطول كفاية الكلام ال لافف في المجلة كلها على إني اتعينت بسبب صلة القرابة وبسببك.
_ما ال يقول يقول يا حبيبتي هو حد له عندنا حاجة أنا زوجك وصاحب ورئيس المجلة يبقى حماك.
_برضه خلينا كويسين وبلاش نأڤور علشان أنا مش بحب أحس إن حد بيكرهني.
هز راسه ورجعنا نتكلم في مواضيع تانية لحد ما مشينا ووصلني البيت.
دخلت لقيت بابا قاعد على الكرسي بتاعه في البلكونة وبيقرأ في كتاب حطيت