إسكريبت رائع بقلم الكاتبه نانسي اشرف

_ حد ذاكر لإمتحان بكرا !
بصوا لبعض كلهم في زهول ورجعوا يبصولي وكل واحد بدأ يقول جملة
_ هو في امتحان بكرا!
امتحان ايه انا معرفش الا الامتحان الكبير الي هو اما ڼموت دا
أنا ليه عمر ما حد حبني بجد !
هو احنا في كلية ايه يا رجالة
قلبت عيني بإستسلام وأنا بتحرك من مكاني بعيد عنهم خطوتين سمعت صوت يونس
_ رايح فين يا ياسين
_ هروح اصور الملخصات
_ اوعا الامتياز
_ بقولك الملخصات
_ هنبقى من أوائل الدفعات
_ يبني الملخ...
_ ألبس ايه وانا رايح لمنى الشاذلي!
دا الصنف عالي باين
سيبته واتحركت ناحية المكتبة وأنا في الطريق سمعت صوت زعيق جاي من على يميني.
_ كيلو طماطم ايه الي عاوزة فيه خمسة وعشرين جنيه يولية!
قربت اكتر والفضول خدني أعرف كيلو الطماطم بكام انهردا.
_ مهو في كل حته ب ١٨
_ جرا ايه يا رقية هو انتي يختي عمرك ما هتبطلي مقاوحة كل ما تيجي تتعبيني كدا
_ ما انتي الي واحدة ضلالية يا أم خالد ومتعرفيش لا ذمة ولا ضمير
_ كدا يا رقية
_ كدا يا أم خالد و اوزني تلاتة كيلو و الكيلو على خمستاشر كمان مش تمنتاشر
كنت في حالة من الزهول وانا شايف أم خالد بكل انصياع بتعمل ايه هي عوزاه وبتوزن الطماطم بصيت على الفلوس الي طلعتها واتحركت
_ يوه! متتحرك يخويا انت كمان!
_ هو انتي خدتي كيلو الطماطم على ١٥!
_ غالي مش كدا .. اروح اخده ب تلاتة ونص
_ بقولك ايه انا رايح اصور ملخصات كتير متيجي تفاصلي مع صحاب المكتبة
_ دا عبيط دا كمان ولا ايه!
_ أصل انا يوم ما فاصلت جبت الاتنين كيلو مانجا ب ٤٥
_ ليه الكيلو كان بكام
_ خمستاشر
_ بسم الله ما شاء الله عملتها لوحدك
_ الراجل قالي صفقة رابحة
_ لا باين عليك مفتح ونبيهه استمر استمر
مشيت وراقبتها لحد ما اتحركت لنهاية الشارع واتحركت بعدها للمكتبة.
_ حد ذاكر حاجة لإمتحان انهردا
بصوا لبعض بقلة تركيز وبدأ كل واحد فيهم يقول جملته.
_ أنا محدش يمتحني الا ربنا على فكرة
بصراحة كدا أنا الكلية دي مش جاية معايا سكة
هي مادة ايه الي احنا داخلينها دي يرجالة
كنت هستنى ايه مشيت ناحية القاعة وقعدت في مكاني وانا بقرأ الأذكار وباخد نفسي بهدوء عشان موترش نفسي
_ قاعة أربعة دي مش كدا
بصيت ناحية الباب ولمحتها وهي داخلة بالدريس الواسع ولبسها المتظبط عكس تماما الصورة الي شفتها امبارح بصت على التيكتس وقعدت في مكانها وأنا عيني متشالتش من عليها.
_ بص في ورقتك
وخدت بالي على صوت الدكتور ان الورقة اتحطت والكل بدأ يحل حطيت عيني في الورقة وسميت الله وبدأت.
_ ها عملتوا ايه
يونس قرب وحط ايده على كتفي الشمال
_ ها هناكل فين