إفصل مفتاح الكهرباء الرئيسي ج1.. حكايات منــال عـلـي

الجزء الاول
اقفل المفتاح ده حالًا يا ابني!
قالتها أم حسن وهي واقفة في طرقة العمارة الضلمة، ماسكة في إيدها فاتورة الكهرباء وعينيها هتطلع من الصدمة. الفاتورة الشهر ده كانت تقريبًا تلات أضعاف كل شهر!
الكهربائي الشاب اللي كانت جايباه بصّ لها وهز راسه، ومد إيده وقفل المفتاح القاطع اللي بيوصل الكهرباء لشقتها.
لكن بدل ما الدنيا تهدى... طلع فجأة من الشقة اللي جنبها خبط وصړيخ هستيري!
بعد أقل من دقيقة، خرجت جارتها أم أشرف من شقتها وشعرها منكوش، وفي إيدها كيس فيه لحمة مفرومة كانت بتفكها من التجميد. أول ما شافت أم حسن، رفعت الكيس في وشها وقالت بزعيق
إنتِ عملتي إيه؟!
خير في إيه؟
خير إيه وزفت إيه؟! عندي أكتر من تلاتين كيلو لحمة وفراخ في الديب فريزر! ولادي جايبينهم لي من البلد! دلوقتي كل حاجة هتبوظ! هو إنتِ مش حاسة بالناس؟!
أم حسن سكتت ومردتش... لأن الحقيقة إن المشكلة دي بقالها تلات شهور بتكبر يوم بعد يوم. من يوم ما أم أشرف حطت ديب فريزر ضخم أبيض في بسطة العمارة. وقتها قالت لها
أسبوعين بالكتير وهشيله يا حبيبتي.
وأم حسن طيبة وقالت ببساطة
ماشي يا ستي، ربنا يسهلك الحال.
لكن الأسبوعين بقوا شهر... والشهر بقى تلاتة، وفجأة فواتير الكهرباء بدأت تطلع ڼار! أم حسن استغربت، ما هي أصلًا عايشة لوحدها، كل اللي عندها تلاجة قديمة وتلفزيون وغسالة بتشغلها مرة كل كام يوم. فإزاي الفاتورة ټضرب بالشكل ده؟!
في الأول حاولت تفتح الموضوع بالذوق، وقالت لجارتها
يمكن فيه قفلة ولا مشكلة في الأسلاك في العمارة؟
أم أشرف ردت ببرود وتقطيم
يا بنتي الدنيا كلها الكهرباء فيها غليت، مش يمكن إنتِ مشغلة دفاية ولا حاجة؟
أم حسن ضحكت ضحكة كلها مرار.. دفاية إيه وهي عمرها ما عتبت بيتها! في الآخر قررت تجيب كهربائي يشوف في إيه. الولد جه وفحص الشقة كلها، وبعدين وقف قدام الحيطة المشتركة بين الشقتين، وحرّك المراية الكبيرة اللي معلقاها جنب الحيطة.
وفجأة... أم حسن شهقت وحطت إيدها على بقها! حكايات منال علي
كان فيه سلك متخبي ورا المراية، داخل في الحيطة ومعدي الناحية التانية لشقة أم أشرف. الكهبائي عقد حواجبه وقال لها
اللي عمل الشغلانة دي صايع وفاهم كويس هو بيعمل إيه!
أم حسن بصت له وهي مش مصدقة
يعني إيه يا ابني؟
قال وهو بيشاور على السلك
يعني الديب فريزر بتاع جارتك شغال على عدادك إنتِ.. بقاله شهور بيسحب كهربا من عندك على قفاكي، وإنتِ اللي بتدفعي الحساب كله!
أم حسن حست إن رجليها سايبة ومش شايلاها
نعم؟! يا نهار مش فايت!
حطت إيدها على قلبها وقالت له وهي بتترعش
صوّر كل حاجة لو سمحت.
الكهربائي طلع موبايله وصور فيديو لكل التفاصيل والخرّم اللي في الحيطة، وبعدين قص السلك وعزله بشريط لحام.