تمن الكرامه.. بقلم منــال عـلـي

تمشي في الشقة بحذر يخوّف. صوت واطي، خطوات محسوبة عشان الخشب ما يزيقش، تاكل اللي يفيض منهم، وتستأذن في أبسط الحاجات. وصلت لدرجة إنها كانت بتستأذن قبل ما تفتح التلاجة تشرب! وساعات كانت تقف قدام باب أوضتها تستنى أم عصام تعدي من الممر عشان ما تخبطش فيها وتسمع كلمة مالهاش لزمة. مش سجينة.. كانت بتقول لنفسها كده.. بس السجين على الأقل عارف إنه مسجون، هي كانت فاكرة إن ده صبر.
لكن بره البيت.. كانت نورا تانية خالص. في شغلها كانت قوية، مديرة شاطرة، والكل بيعمل لها ألف حساب. محدش كان يتخيل إن القوة دي مجرد قشرة فوق تعب وكسرة ساكنة جوه روحها.
أول مرة نامت فيها في الصالة كانت في الشهر التالت لجوازها.
عصام كان مسافر مأمورية يومين، وأم عصام دخلت عليها الأوضة وقالت بلهجة مفيهاش نقاش
مش هينفع تنامي في أوضة ابني لوحدك وهو مش هنا. انزلي نامي في الصالة عشان لو حد خبط ولا حصل حاجة. بقلم منال علي
نورا كانت عاوزة تصرخ، تقول لها إن دي أوضتها ودا بيتها وهي مش ضيفة تقيلة. بس أم عصام نظرتها بتقطع أي كلام. وعصام في التليفون قال لها ببرود
اسمعي الكلام يا حبيبتي.. عادي يعني، ليلتين وهعدوا.
كلمة عادي دي.. كانت بتكسر فيها حتة جديدة كل مرة.
في ليلة مطر زي دي، نورا كانت لسه راجعة من شغلها مهدودة، وموبايلها رن.
كانت منار، أخت عصام الصغيرة، بتكلمها وصوتها بيترعش
نورا.. إنتي لوحدك؟
أيوة يا منار، في إيه؟
لازم أقولك حاجة.. ضميري مش مريحني، بس بالله عليكي ما تقوليش إني قولتلك.
وسكتت لحظة كأنها بتجمع شجاعتها.
قولي يا بنتي في إيه؟ قلقتيني.
ماما.. هي اللي مانعة إنكم تسيبوا البيت. الفلوس كانت موجودة في البنك من قبل ما تتجوزوا أصلاً. هي اللي قالت لعصام يخليكم هنا.. عشان تفضل كاسرة عينك وتتحكم فيكي وفي حياتك وتفضل هي الكل في الكل.
نورا حست إن الأرض بتلف بيها. الموبايل كان تقيل في إيدها كأنه حجر.
إنتي متأكدة من الكلام ده؟
سمعتهم بودني أكتر من مرة.. وعصام وافقها عشان ما يزعلهاش.. وعشان يوفر الفلوس لنفسه.
في اللحظة دي.. حاجة جوه نورا انكسرت للأبد، وصوت الكسرة كان عالي قوي جوه قلبها.
دلوقتي، وهي واقفة قدام الكنبة والبطانية الخشنة، كل ال ١١ شهر دول مروا قدام عينيها زي شريط سينما حزين.
هتفضلي واقفة تتفرجي على الكنبة؟ قالتها أم عصام بضيق وهي ماشية ناحية أوضتها.
نورا رفعت عينيها وبصت لها بقوة أول مرة تظهر
١١ شهر يا أم عصام.
أم عصام وقفت واستغربت
إيه؟ بتقولي إيه؟
١١ شهر وأنا فاكرة إن القسۏة دي نظام، وإن الذل ده صبر، وإن كدب ابنك ظروف.
الجو هدي فجأة. صوت المطر بره بقى أوضح. متوفره على روايات